Mark 14

La warwara taum sur lar umkol e Iesu

(Mt 26:1-5; Lk 22:1-2; Jn 11:45-53)

1Naura pukakiar lanigo ana lotu na Han Lakai, pa ana lotu na bret ning belal is ono, a leklek na tena artabarla tetek e God taum ana tena asaerla tagun a Warkurai la nuknuk sur ta ngas sur lar tong kumnan pas e Iesu pa lar umkoli. 2La atongi mange, “Gong dala toli ana lotu, sakana a tarai lar arsakai.”

Ning a hane i pek a tomtobo ana pukul e Iesu

(Mt 26:6-13; Jn 12:1-8)

3E Iesu kaning ot e Betani, ana rumai ane Saimon, esaning lanigo i kurah ana lepra. Kaning ot i hangan, ning a hane i hanot teteki taum ana koto na tomtobo ning di atongi mang a nad. I ngangaten, pa kaning ana koto di toli ana hat. I pagal sen a matana koto, pa i peki ana pukul e Iesu. 4Dingla na tarai ning la kes tingia, la balakut pa la awara artalai mange, “Sur asa ning di amus oros ka a tomtobo ne? 5I toh pasi sur dir siurani, pa dir kubas a mani i arlar lar a arlou ana ning a rau ning di titol pasi, sur dir tabar a kapan a taraila ono.” Pa la balakut a hane ning.

6E Iesu i atai la mange, “Mulo noreni. Sur asa mulo atapunuki? I ka tol tar a wakak a toltol hok. 7A kapan na tarai la laun taum ot o mulo. Ning mulo mang sur mulor awakak la, mulor toli ka. Ika iau bel ar kes tikin taum o mulo. 8I ka tolsot pas a utna ning i toh pasi sur ir toli. I pek tar a tomtobo ana palaok sur ir sang nigon iau sur anuk a pukakiar na minat. 9A atong momoli ta mulo, ting ana rakrakan hanua rop, ning dir warawai ana Wakak a Warwara, dir warwara otleng ana utna ne a hane ka tol tari hok, sur a risana ir tur na akinalang.”

E Judas i malmaling sur ir tuam tar e Iesu

(Mt 26:14-16; Lk 22:3-6)

10E Judas Iskariot, takai tagun a ning a bonot pa pisir naur a kakak a asasaerla, i han tetek a leklek na tena artabarla tetek e God, sur ir tuam tar e Iesu tetek la. 11Ning la longori, la gas, pa la lele sur lar lowi. Pa e Judas i nuknuk sur ta ngas ning ir tuam tar e Iesu onoi.

E Iesu taum ana nuna kakak a asasaer la kes ana utna na hangan ana lotu na Han Lakai

(Mt 26:17-25; Lk 22:7-14, 21-23; Jn 13:21-30)

12Ana ningnigo na pukakiar ana lotu na bret ning bel ta is ono, ning di sira umkol a natnatara sipsip onoi sur a lotu na Han Lakai, a kakak a asasaerla ane Iesu la dekeni, “U mang sur milar han utaha, sur milar sang pas a utna na hangan sur u ana lotu na Han Lakai?” 13I sune sen naur tagun anuna kakak a asasaerla, pa i atai diau mange, “Mur kas usaot e Jerusalem. Pa ning a barsan i los a tnan koto na malum, ir songo mu, pa mur muri. 14Ning ir kas ana ta rumai, mur atai a tamana rumai mange, ‘A Tena Asaer i atongi mang: Kanaha a tuka rumai ning mila taum ana nuk a kakak a asasaerla, milar ien a utna na hangan na Han Lakai ano?’ 15Pa ir asangan tar mu ana tnan tuka rumai tisaot, ning di ka sang tari, pa mur sang a utna na hangan ano.” 16Naura kaklik asasaer dia han usaot e Jerusalem, pa dia pastetek rop ot a ututnala ning e Iesu i atong tari tan diau. Pa dia sang a utna na hangan na Han Lakai.

17Ning a rah ma, e Iesu taum ana nuna ning a bonot pa pisir naur a kakak a asasaer la hanot. 18Kaning ot la hangan, i atongi mange, “A atong momoli ta mulo, ning a halim mulo ir tuam tar iau, takai ot tagun mulo ne dala hangan taum.”

19La balmamahat, pa la rop taktakai la dekeni mange, “Belsur iau ngadek?” 20Pa e Iesu i keles la mange, “Takai tagun mulo ot ning a bonot pa pisir naur, ning mia amurung amia naur a bret taum ana dis. 21A Nat a Barsan ir hirua larning di ka tumus tari ana Buk Tabu. Ika ir laulau kol tetek a barsan ning ir tuam tari. Ir wakak kol ning bel di agon tari sur gong i kilang a kankan ana warkurai.”

A utna na hangan ana Leklek

(Mt 26:26-30; Lk 22:14-20; 1Kor 11:23-25)

22Kaning ot la hangan, e Iesu i los pas a bret, i atong wakak pas onoi, i kibiki, pa i tabar anuna kakak a asasaerla ono. I atongi mang, “Mulor kubasi, ine a palaok.” 23Lamur i los pas a kap, i atong wakak pas onoi, i sarani tan la, pa la rop la hisop taguni. 24I atai la, “Ine a sulukik, a kunubus i dat taum tar e God pa taraila. A sulukik ne i tapek sur a galis. 25A atong momoli ta mulo mang, belar hisop ulak ta wain, tuk ning ar hisop a tona wain ting na matanitu ane God.”

26Pa la saken pas ning a saksak a lotu, pa la purum usaot ana Mangir na Oliw.

E Iesu i warwara nigo ana arpuai ane Pita

(Mt 26:31-35; Lk 22:31-34; Jn 13:36-38)

27E Iesu i atai la mange, “Mulo rop mulor han pas kusun iau, larning di ka tumus tari ana Buk Tabu mang,

E God i atongi mange, ‘Ar umkol a tena tai alar a sipsip,
pa a sipsipla lar liu sarara.’ ^a
28Ika ning a ka kamtur ulak kusun a minat, ar nigo utumo e Galili.”

29E Pita i atai i mange, “Ning la rop lar han kusun u, iau bel.” 30E Iesu i atai i mange, “A atong momoli tam, onone ana morom, ning a kok belot ir areur a kurkurirakuk, ur munatol na puai mang bel u tasman iau.” 31Ika e Pita i warwara rakrakai teteki mange, “Bel ar puai sen u. Madeki ar mat taum hom.” A kakak a asasaerla rop otleng la atongi manglarning.

E Iesu i nunung ting e Getsemani

(Mt 26:36-46; Lk 22:39-46)

32E Iesu taum ana nuna kakak a asasaer la hanot ting ana ning a pukna di atongi e Getsemani, pa i atai la mange, “Mulor kes te, pa iau ar nunung pas.” 33Pa i ben e Pita, e Jems pa e Jon. Ana mahis a pukakiar ning i kilang a tnan balmamahat pa i nuknuk kol. 34I atai ditol mange, “A balmamahat ting na inguk i laulau kol, pa milau ar mat ono. Mutol ar kes ot te, pa mutol ar tai alar.”

35I han siklik utisa, i punga tuntudu ting lapiu, pa i nunung sur a mahis a pukakiar na mamahat ir han lakai, ngadek ning ir wakak manglarning. 36I nunung mange, “Tata, Tata, a ututnala rop i toh pas u sur ur toli, ur kepsen a mamahat a kap ne kusun iau. Ika gong u mur a nuknukik, ur mur ot a nuknukim.”

37Ning i ulak, i oroi ditol ka borbor duman. I deken e Pita mange, “Saimon, kaning ot u borbor duman? Bel ur tolsot sur ur tai alar ana tik ta mahis a pukakiar ka? 38Mutol ar tai alar, pa mutol ar nunung, sur gong mutol punga ana larlarla. A ingumutol i mang sur ir longor, ika a palaomutol i ngol.”

39Pa i han, pa i nunung ulak ana nunung ning ka atong tari kabah. 40Ning i ulak, i oroi ditol ka borbor duman kale, anasa a matanditol i sulam kol. Bel ditol tasman asa ning ditol ar kelesi ono. 41Ning i aretol a tinan anunai tetek ditol, i atongi mange, “Mutol ar borbor liklik kama? I sot ka! A tuka pukakiar ka hanot. Oroi, di ka tuam tar a Nat a Barsan ting ana kuna tena laulaula. 42Mutol tur, dalar han! Oroi, a barsan ning ir tuam iau imaine.”

Di tong pas e Iesu

(Mt 26:47-56; Lk 22:47-53; Jn 18:3-12)

43Kaning ot e Iesu i warwara, e Judas, ning tagun a ning a bonot pa pisir naur a kakak a asasaerla, i hanot taum ana kunum a taraila. La los a liwanla na harum taum ana puka buturla. A leklek na tena artabarla tetek e God, taum ana tena asaerla tagun a Warkurai pa a ningnigola la sune la. 44Esaning ir tuam tar e Iesu ka atai nigon tar a kunum a tarai ana akinalang ning ir toli o e Iesu mange, “Esining ar goro i, i ot ning. Mulor tong akes pasi, mulor ben maskan pasi pa mulor tai alar wakaki.”

45Pa e Judas i han kapit tetek e Iesu, pa i atai i mange, “Tena Asaer!” Pa i goro i. 46A tarai la dat pas e Iesu pa la tong akesi.

47A halinla ning i tur milau, i lasur pas anuna liwan na harum, pa i umsem a talngana tena longor anuna ningnigo na tena artabar tetek e God. 48Pa e Iesu i atai la mang, “Mangmangasa, ngadek iau a tnan tena harum pa kinkinau, pa ne mulo hanot taum ana liwanla na harum pa a puka buturla sur mulor tong akes iau? 49Ana pukakiarla rop dala kes taum ana rumai a artabar, a sira asaer a taraila, pa bel mulo tong akes iau. Ika di toli larne sur dir tolsot pas a warwara ting na Buk Tabu.” 50Pa a kakak a asasaerla rop la liu pas kusuni.

51Ning a barman, i mermer pas ka ana kaen, i mur e Iesu. La tong akes pasi, 52i migen sen anuna kaen, pa i liu mengere kama.

E Iesu i tur ana warkurai namatana tarai a kiwung

(Mt 26:57-68; Lk 22:54-55, 63-71; Jn 18:13-14, 19-24)

53La ben pas e Iesu tetek a ningnigo na tena artabar tetek e God. Pa a leklek na tena artabarla rop tetek e God, a ningnigola, taum ana tena asaerla tagun a Warkurai la hanot taum tingia. 54E Pita i mur amon e Iesu, ika i bakbak ot, pa i kas ting na pukna anuna ningnigo na tena artabar tetek e God. Pa i marnan a iah taum ana tena tai alarla.

55A leklek na tena artabarla tetek e God, taum ana tarai a kiwung rop la tai sur ta rongo ning e Iesu ka tol tari, sur lar tiwi ono, pa lar umkoli, ika bel la tai pas ta utna. 56A galis la atong a asasongo na warwara o e Iesu, ika anunla na warwara bel i han taum. 57Dingla na tarai la tur pa la atong a asasongo na warwara o e Iesu mange, 58“Mila longori i atongi mange, ‘Ar regen sen a rumai a artabar ne ning a tarai la toli, pa ana natol a pukakiar ka ar tol pas tik ning bel a tarai la toli.’” 59Ika anunla na warwara otleng bel i han taum.

60A ningnigo na tena artabar tetek e God i tur salanigo tan la, pa i deken e Iesu mange, “I mangasa, bel ur keles a warwarala na artitiu ne tetek u?” 61Ika e Iesu bel i warwara. A tena artabar ne i deken ulaki mange, “U a Karisito, a Nat e God, ning i ngis, o bel?” 62E Iesu i kelesi mange, “Iau ot ning, pa lamur mulor oroi a Nat a Barsan ir kes ana ris a sot a kuna e God, ning i rakrakai kol, pa ir hanot ana laukap misaot na langit.”

63A ningnigo na tena artabar i dat silir anuna kaen ot, pa i atongi mange, “Dala mang ulak sur ta warwara na artitiu sur asa? 64Mulo ka longor tar anuna na warwara laulau o e God. Asa mulo nuki?” Pa la rop la malmaling sur dir umkol e Iesu. 65Dingla na tarai tagun la, la namsan e Iesu, la poroi alar tar a matana, la tubuli pa la atai i mange, “U a propet, atai mila, esining i tubul u!” A tena tai alarla la ben pasi pa la umi.

E Pita i puain sen e Iesu

(Mt 26:69-75; Lk 22:56-62; Jn 18:15-18, 25-27)

66Ning e Pita kanumot lapiu ana rumai, ning a hane, a tena titol anuna ningnigo na tena artabar tetek e God i hanot. 67Ning i oroi e Pita kaning i marmarim, i ngoson rakrakai i, pa i atai i mange, “U otleng u keskes taum o e Iesu a te Nasaret.” 68Ika i puai mange, “Bel a tasman asa ning u warwara ono, pa bel a talapor ono.” Pa i purum utumo ana taman na woroh. Pa a kok i kurkurirakuk kakat. 69A hane ning i oroi ulak pasi, pa i atai la ning la tur tingia mange, “A barsan ne i otleng takai tagun la.” 70E Pita i puai ulak.

Lamur siklik, la ning la tur milau e Pita, la atai i mange, “A momolna ot, u otleng takai tagun la, anasa u a te Galili.” 71Pa i lele tetek la, i atongi mange, “E God ir warkurai laulau iau ning ar asongo. Bel a tasman a barsan ning mulo warwara ono.” 72Pa a kok i munaur na kurkurirakuk kakat. Pa e Pita i nuk pas a warwara ning e Iesu ka atong tari tana mange, “Ning a kok belot ir areur a kurkurirakuk, ur munatol na puai mang bel u tasman iau.” I nuk pasi pa i tangis kol.